የዋና ሥራ አስፈጻሚ መልዕክት

 

ኢትዮጵያ ባለፉት ሁለት አስርት ዓመታት ፈጣንና ተከታታይ ሁለንተናዊ ዕድገት ማስመዝገብ ችላለች፡፡ ለእነዚህ የልማት ትሩፋቶች የኤሌክትሪክ ኃይል የማይተካ ሚና ተጫውቷል፡፡ የኢትዮጵያ ኤሌክትሪክ ኃይል እንደ አዲስ ከተቋቋመ አምስት ዓመታት ያስቆጠረ መ/ቤት ሲሆን፤ በእነዚህ ዓመታት ውስጥም በርካታ ሥራዎችን ማከናወን ችሏል፡፡

 

በተለይም ተቋሙ እንዲያከናውን በአዋጅ ከተሰጡት አበይት ተልዕኮዎች መካከል የኃይል ማመንጫዎች ግንባታ ዋነኛ ተግባሩ ሲሆን  በዚህ ረገድም ከውሃ፣ ከንፋስ እና ከጂኦተርማል የኃይል አማራጮች  የተለያዩ የኃይል ማመንጫ ፕሮጀክቶችን በመገንባት ላይ ይገኛል፡፡

 

ከእነዚህ የኃይል ማመንጫ ፕሮጀክቶች መካከልም በ2009 ዓ.ም በይፋ ተመርቆ አገልግሎት መስጠት የጀመረው የጊቤ III የኤሌክትሪክ ኃይል ማመንጫን ጨምሮ፡-

  • የታላቁ የኢትዮጵያ ህዳሴ ግድብ ፕሮጀክት ሥራ 65 በመቶ
  • የገናሌ ዳዋ IIIኛ የኤሌክትሪክ ኃይል ማመንጫ ፕሮጀክት 98.92 በመቶ
  • የኮይሻ ኃይል ማመንጫ ፕሮጀክት 24 በመቶ የተከናወኑ ሲሆን
  • ባለ 500 ኪ.ቮ የኢትዮ-ኬንያ እና ባለ 400 ኪ.ቮ የገናሌ ዳዋ III ከፍተኛ የኤሌክትሪክ ኃይል ማስተላለፊያ መስመሮች ግንባታ በመገባደድ ላይ ናቸው፡፡

እንደዚሁም የሚመነጨውን የኤሌክትሪክ ኃይል ወደ ብሄራዊ የኃይል ቋት እንዲገባ በማገዝ ረገድ ጉልህ ድርሻ ያላቸውን በርካታ ከፍተኛ የኤሌክትሪክ ኃይል ማስተላለፊያ መስመሮች እና የኃይል ማከፋፈያ ፕሮጀክቶች በመገንባት ላይ ይገኛሉ፡፡

የሃገሪቱን ፍላጎት ከማሟላት ጎን ለጎን ከፍጆታ የሚተርፈውን  የኤሌክትሪክ ኃይል ለውጭ ገበያ በማቅረብ የማይናቅ የውጭ ምንዛሪ ማስገኘት ከማስቻሉም በላይ አህጉራዊ ምጣኔ ሃብታዊ ትስስር የተሻለ እንዲሆን የሚያደርገውን አስተዋፅኦ ያሳድገዋል፡፡

እነዚህንና ሌሎች በርካታ ተግባራትን በማከናወን ድርጅታችን በመጀመሪያው የዕድገትና ትራንስፎርሜሽን ዕቅድ ዘመን ያስቀመጠውን ግብ ከፍተኛ በሚባል ደረጃ ማሳካት ተችሏል፡፡ በተጨማሪም ተቋማችን በአንደኛው የዕድገትና ትራንስፎርሜሽን መርሃግብር ያልተጠናቀቁትን ተግባራት በሁለተኛው የዕድገትና ትራንስፎርሜሽን የዕቅድ ዘመን አጣምሮ በማከናወን በአሁኑ ጊዜ ያለውን 4233 ሜጋ ዋት ኃይል የማመንጨት አቅም በእጥፍ ለማሳደግ  ከፍተኛ ጥረት በመደረግ ላይ ይገኛል፡፡

በተለይም በኃይል ልማቱ ዘርፍ በሀገር ውስጥም ሆኑ በውጭ ባለሀብቶች ከመንግስት እና ከግሉ ባለሃብት ጋር በሽርክና (public private partnership) በጋራ መስራት የሚችሉበትን መደላድል፣ፖሊሲ እና  የህግ ማዕቀፎች ተዘጋጅተው በሚስትሮች እና ተወካዮች ምክር ቤት ፀድቀው ሥራ ላይ እንዲውሉ ተደርጓል፡፡

በመሆኑም ይህ የአሰራር ስርዓት ተግባራዊ እንዲሆን መደረጉ ለኃይል ልማት ሥራዎች አቅም  ከመፍጠሩም በተጨማሪ የሀገር እና የውጭ ሀገር አልሚዎች በጋራ የዳበረና የበለፀገ ዕውቀት እና የቴክኖሎጂ ሽግግር ለማድረግ የሚያስችል ይሆናል ተብሎ በሰፊው ይታመናል፡፡

በዚህም መሰረት በመንግስትና የግል አጋርነት (መግአ) ቦርድ 2,071 ሜጋ ዋት የማመንጨት አቅም ያላቸው አምስት የውሃ እና 1,000 ሜጋ ዋት የማመንጨት አቅም ያላቸው ስምንት የፀሐይ ኃይል ማመንጫዎች በድምሩ አስራ ሶስት ፕሮጀክቶች የተመረጡ ሲሆን ከእነዚህ ውስጥ ስድስቱ የፀሐይ ኃይል ማመንጫ ፕሮጀክቶች ወደጨረታ እንዲገቡ ተወስኗል፡፡ ቀሪዎቹም በተመሳሳይ ለመግአ ቦርድ እየቀረቡ የሚፀድቁ ይሆናል፡፡

በቀጣይም ለንፋስ ኃይል ፕሮጀክቶች ልማት የሚያስፈልጉ ቅድመ እና ድህረ ጥናቶች በቂ የንፋስ ኃይል የሚገኝባቸውን ሥራዎች መለየት እና የቅኝት እና ቅድመ ጥናቶች (Reconnaissance and feasibility studies) እና የጨረታ ሰነዶች ዝግጅት ሥራዎች ተከናውነዋል፡፡

ስለሆነም ይህንን ሰፊ ዕቅድ ከግብ ለማድረስ ሁሉም የተቋሙ አመራሮችና ሠራተኞች ተገቢ የአመለካከት ለውጥ በማምጣት እጅ ለእጅ ተያይዘን ከፍተኛ ርብርብ ማድረግ የሚጠበቅብን መሆኑን ለማስገንዘብ እወዳለሁ፡፡ 

ተቋሙ እንደ መንግስት ባለበጀት መስሪያ ቤት የሚመራ ሳይሆን በኮርፖሬት ቢዝነስ አስተሳሰብ የሚመራ በመሆኑ ሁሉም ለጊዜ ትርጉም መስጠትን፣ ለደንበኞች ፍላጎትና ክብር መስጠትን፣ ጥራት እንደ መወዳደሪያ በማየትና፣ ወጪ ቆጣቢ የሆኑ ተግባራት በማከናወንና ለሰጠው አገልግሎት ገቢ በመሰብሰብ ሂደት የሚያስፈልጉ የአስተሳሰብና የድርጊት ለውጥ ለማምጣት ቁርጠኛ ሆኖ እንዲንቀሳቀስ ጥሪዬን አቀርባለሁ፡፡

በተጨማሪም ሥራዎቻችን ዘመናዊና ዓለም አቀፋዊ ተወዳዳሪ የኤሌክትሪክ ተቋም እንዲሆን የሚያስችሉ ተግባራት እንዲከናወኑ እና ልማዳዊ አሰራርን በዘመናዊና በተፋጠነ አሰራር በመተካት ስር እንዲሰድ የበኩላችሁን እንድትወጡ አደራዬን አስተላልፋለሁ፤ ውጤት የምናስመዘግብበት መልካም የሥራ ጊዜ እንዲሆንልን እመኛለሁ፡፡

                                                    

ኢንጂነር አብርሃም በላይ  (ዶ/ር)

የኢትዮጵያ ኤሌክትሪክ ኃይል ዋና ስራ አስፈፃሚ

 

 

 

 

ዋና አድራሻ

EEP
Phone: +251 11 666 66 77
Fax: +251 11 666 66 78
P.O.Box 59, Addis Ababa, Ethiopia
Contacts

ክልልላዊ መሥሪያ ቤቶች

  • North
  • East
  • South
  • West

ስለ ኢኤኃ

EEP was established in 2013 by the Council of Ministers Regulation No.302/2013 and is responsible for generating, transmitting and wholesale electricity to be utilized nationwide as well as neighboring countries.
About EEP