Transmission and Substation Project

የኢትዮ- ኬንያ ፕሮጀክት ለክፍለ አህጉር የኃይል ትስስር ከፍተኛ ሚና ይኖረዋል December 27, 2017

በሃገሪቱ ታሪክ ከጅቡቲና ከሱዳን ቀጥሎ ሶስተኛ ድንበር ተሻጋሪ ፕሮጀክት የሆነው የኢትዮ-ኬንያ ከፍተኛ የኃይል ማስተላለፊያ መስመር ግንባታ ሲጠናቀቅ ክፍለ አህጉራዊ የኃይል ትስስርን ከማጠናከር አኳያ የጎላ ሚና ይጫዎታል፡፡ሁለት ሺህ ሜጋ ዋት ኃይል የመሸከም አቅም ያለው ይህ ከፍተኛ የኃይል ማስተላለፊያ መስመር ኬንያን የኤሌክትሪክ ኃይል ተጠቃሚ ከማድረግ ባለፈ ታንዛንያም ከዚህ መስመር ተጠቃሚ እንድትሆን ያለመ ዘርፈ ብዙ ፕሮጀክት ነው፡፡

የፕሮጀክቱ ግንባታ ተጠናቆ አገልግሎት መስጠት ሲጀምር ከኤሌክትሪክ ሽያጭ ከሚያስገኘው የውጪ ምንዛሬ ባሻገር በሃገራቱ መካከል ያለውን ኢኮኖሚያዊና ማህበራዊ መስተጋብር ይበልጥ እንደሚያጎለብት ታምኖበታል፡፡1055 ኪ.ሜ ያህል ርዝመት ያለውና ከወላይታ ሶዶ ተነስቶ ኮንሶን በማካለል እስከ ኬንያ ድረስ እየተዘረጋ ያለው የኢትዮ- ኬንያ ባለ 500 ኪ.ቮ ከፍተኛ የኃይል ማስተላለፊያ መስመር፤ የኤሌክትሪክ ኃይል በማስተላለፍ አቅሙ ህዳሴ-ዲዴሳ-ሆለታ ኃይል ማስተላለፊያ መስመር ቀጥሎ እየተገነባ ያለ የሃገሪቱ ግዙፍ ፕሮጀክት ነው፡፡ አጠቃላይ የመስመር ዝርጋታው ሥራ አፈፃፀምም 80 በመቶ ደርሷል፡፡

 

ግንባታው በ2008 ዓ.ም የተጀመረው ይህ የከፍተኛ ኤሌክትሪክ ኃይል ማስተላለፊያ መስመር በኢትዮጵያ በኩል ያለው የግንባታ ምዕራፍ የኃይል ማከፋፈያ ጣቢያውን ጨምሮ በሦስት ሎት ተከፍሎ በመከናወን ላይ ሲሆን ሎት አንድ የኃይል ማከፋፈያ  ጣቢያ ሎት ሁለት ከወላይታ ሶዶ እስከ ኮንሶ እንዲሁም ሎት ሦስት ከኮንሶ እስከ ኬንያ ድንበር ድረስ ያለውን የከፍተኛ የኤሌክትሪክ ኃይል ማስተላለፊያ መስመር ያጠቃልላል፡፡በእነዚህ ጊዜያቶች የመጋቢ መንገዶች ግንባታ ሙሉ በሙሉ የተከናወነ ሲሆን የ974 የታዎር ፋውንዴሽን ቁፋሮ ሥራ እንዲሁም ለታዎር ግንባታ ግብአት የሚሆኑ ዕቃዎችን ከውጪ ሃገር የማጓጓዝ ሥራዎች ሙሉ በሙሉ ተከናውነዋል፡፡በተጨማሪም በኢትዮጵያ በኩል ሊተከሉ ከታቀዱት የ994 ታዎሮች መካከል የ967 ታዎሮች ተከላ የተጠናቀቀ መሆኑን ከፕሮጀክት ጽ/ቤቱ ያገኘነው መረጃ ያስረዳል፡፡ የኤሌክትሪክ ገመድ ዝርጋታ ሥራ በሚያዝያ 2009 ዓ.ም የተጀመረ ሲሆን 318 ኪ.ሜ ያህል የገመድ ዝርጋታ ሥራ ሙሉ በሙሉ ተከናውኗል፡፡

 

በአጠቃላይ በኢትዮጵያ በኩል ያለው የኃይል ማስተላለፊያ መስመር ግንባታ የኢንጂነሪንግ ሥራዎች 97 በመቶ፣ የግብአት ዕቃዎች ማምረት መቶ በመቶ፣ የማጓጓዝ ሥራዎች 98 በመቶ፣ የቁፋሮ  እና የፋውንዴሽን ሥራዎች 98 በመቶ፣ የታዎር ተከላ 97 በመቶ እንዲሁም የኤሌክትሪክ ገመድ ዝርጋታ ሥራዎች ከ45 በመቶ በላይ ተከናውነዋል፡፡

ቻይና ኤሌክትሪክ ፓወር ኢኩውፕመንት (China Electric Power Equipment Company Limited (CET)) የተሰኘው የቻይና ኩባንያ የፕሮጀክቱን ሥራ ኮንትራት ወስዶ የግንባታ ሥራውን በማከናወን ላይ ይገኛል፡፡አጠቃላይ የፕሮጀክቱ ወጪ 2,404,418,272 ብር ያህል ሲሆን ከአፍሪካ ልማት ባንክ በተገኘ ብድር የተሸፈነ ነው፡፡ ፕሮጀክቱ ለ600 ያህል ኢትዮጵያውያን ጊዜያዊ የሥራ ዕድል የፈጠረ ሲሆን የቴክኖሎጂና የዕውቀት ሽግግርን በተመለከተም ለቀጣይ ሥራዎች ወሳኝ ጠቀሜታ ያላቸው ግብዓቶች ተገኝተዋል፡፡ የግንባታ ሥራው በ2008 ዓ.ም የተጀመረው ይህ ፕሮጀክት አጠቃላይ ሥራው መጋቢት 2010 ዓ.ም ይጠናቀቃል ተብሎ ይጠበቃል፡፡